市場每周分析 18-22/9 港期、道指及納指

2023 年 9 月 18 日

港期每周分析

留意9月餘下的日子，小心真正突破

港期經歷過十號波同黑雨之後，即刻變得沉悶，呢個星期都係好淡分水區域同上面阻力區之間玩，跌落去179-180又升返上去18200左右，星期五就好啲，升多少少上去18400再返落去。

睇返個走勢，其實港期現階段仍然仲係個9月嘅戰火區入面，大致上可以分為17900-18000區域，以及18400阻力，即係話好淡友係未分出勝負，好友雖然多次守住個18000關口，但係又未有力推上去，而淡友就未能成功攻落去，變左成個星期都係range 格局。不過要留意，9月唔係淨返好多日，踏入月尾，呢個月月波幅到今日都只係得1000點左右，所以要小心黎緊嘅日子開始出現真正的突破。

咁下星期方面，同上星期差唔多，但整體上黎講，如果可以守住17948-18085，向上走嘅機會係比較大，上星期五係跌返落去18000水平，所以暫時係range 底，守住嘅話可以輕微睇上架，向上第一關大佬會係18287-18390，需要企上去先係轉強，向上睇返住2個阻力水平目標18287/18560。而以上嘅走勢失守17948就要小心係向下走，目標係17810/17639。

好淡分水 17948-18085

重要位置(轉強) 18388

重要位置(轉弱) 17948

周線向上目標 18287/18560

周線向下目標 17810/17639

道指每周分析

留意35000關口

道指方面，上星期就提及到，走勢上出現左個收窄三角，道指係明顯一直守住個三角之上，去到星期先借助PPI數據向上走，不過可惜嘅係未去到我地第二目標就回返哂落黎。成個星期分析都係同大家提及一樣野，就係睇住個35000關口，暫時睇落係比較危險，星期五收返落黎都唔可以企穩35000水平。

中線走勢黎睇，有機會係要繼續做返個調整先，下星期對於道指嘅要求比較高，需要重上返35400之上先係轉強，但仍然係屬於之前高位橫行區，黑框入面，阻力水平35290/35580。所以下星期仍然都係睇得比較淡，失守34910水平就大機會要向下測試34464-34597區域支持，之後就要睇住個上升軌道會唔會破壞，破壞埋就比較差，要落埋34261左右。

好淡分水 34910-35042

重要位置(轉強) 35399

重要位置(轉弱) 34910

周線向上目標 35290/35580

周線向下目標 34597/34261

納指每周分析

納指接近失守

最後到納指，納指方面，呢個星期確實係比較失望，星期頭已經係開始有啲失守好淡分水，幸好就係可以上返去，但星期五受到啲科技股拖累，一下落返去轉弱位置153水平，紅色呢個上升軌道都係接近失守。

納指同道指一樣，現階段對於要開始返上升走勢嘅要求都係比較高，要重上返15590水之上先係有機會轉強，上面仍然都係15792/15972阻力目標，但阻力區已經下降至15519-15590區域，未能突破嘅話仍然係偏淡。下星期仍然都係睇淡啦，跌破15337水平係需要向下測試15046-15120區域支持，甚至要向下試埋15000關口支持，目標為15120/14973。